Jumat, 27 Februari 2026
KEDHUNG KAWRUH BULAKSUMUR
I
Dhandhanggula
1.
Winursita pawiyatan inggil,
Murih kuncarane nusantara,
Tumangkar ngrembuyung gedhe,
Peguron Bulaksumur,
Dwijatama gya amarsudi,
Kapribadening bangsa,
Tuwuh mekar arum,
Sanggya taruna nagara,
Ngesthi ngelmi linambaran jatidhiri,
Mimbuhi kasantosan.
2.
Winursita sabda aris manis,
Pak Profesor Soeripto amedhar,
Jene pindha mas rinonce,
Ilmu laku dinulu,
Puja puji sri pangastuti,
Kawignyan kasampurnan,
Warisan leluhur,
Majapahit Kahuripan,
Singasari Daha Jenggala Kediri,
Demak Pajang Mataram.
3.
Wulang wuruk keh tepa palupi,
Maha Guru Profesor sanyata,
Pak Panut Mulyono aweh,
Padhang terang sumurup,
Anelahi bumi pertiwi,
Pangarsa Gadjah Mada,
Pawiyatan agung,
Ngrembaka arum kuncara,
Jroning kapti ngudi pakarti lestari,
Ngejayeng nusantara.
4.
Amarsudi wasita sejati,
Hardiyanto Profesor utama,
Sumarah sareh pikoleh,
Kedokteran satuhu,
Tata titi tatas pertitis,
Wibawa lan widada,
Uwur sembur tutur,
Jangka jangkah ngarah arah,
Lenging budi saranane darma bakti,
Sumungkem nusa bangsa.
II.
Gambuh
1.
Sakeh wejangan kawruh,
Prof Soeripto ambabar pituduh,
Olah pikir mengkoni jagad sakalir,
Jiwa raga wenang dunung,
Pana pranawa miraos.
2.
Profesor agung luhur,
Bapak Panut Mulyono misuwur,
Wus katitik Gadjah Mada dadi becik,
Dosen mahasiswa guyub,
Gumregut jumeneng Rektor.
3.
Jumbuh ingkang ginayuh,
Hardiyanto Profesor kang teguh,
Ahli medis gancar lancar laras laris,
Urip urup tekad murup,
Pribadi cahya mencorong.
III.
Pangkur
1.
Gumelaring Widyatama,
Maha Guru Soeripto sung pamardi,
Mesu budi sembah kalbu,
Wejangan olah rasa,
Kang tumuwuh pambengkasing baya kewuh,
Wulangan miwah wedharan,
Cipta saamita prayogi.
2.
Pangarsaning pawiyatan,
Panut Mulyono Guru Besar inggil,
Minangka Rektor pinunjul,
Nata universitas,
Sarwa unggul jangka jangkah sigra kabul,
Minterake mahasiswa,
Labuh labet mring negari.
3.
Mujudake kesehatan,
Pak Profesor Hardiyanto memetri,
Antep antuk wulang wuruk,
Pambudi bagas waras,
Talang tulung sawang srawung sambang sambung,
Tata tentrem karta harja,
Subur makmur lahir batin.
IV.
Mijil
1.
Wening eling manjing tumaliling,
Suminar sumorot,
Amimbuhi gedhe perbawane,
Mbudidaya wosing meditasi,
Kapti wus nyawiji,
Pangrungu pandulu.
2.
Sabda pemimpin midhit angrangin,
Rektor andhap asor,
Lenggah jejer mahasiswa moncer,
Gya lumaris sarjana winasis,
Pinter samukawis,
Pra dwija nyengkuyung.
3.
Pak Profesor Hardiyanto yekti,
Sanak kadang caos,
Pakurmatan karana sumendhe,
Pangalembana dugi prayogi,
Wekdal olah ngelmi,
Sarana meguru.
V.
Sinom
1.
Profesor Soeripto pirsa,
Jenggala Demak Kediri,
Singosari Kahuripan,
Pajang Medhang Majapahit,
Kraton Daha kawuri,
Mataram dadya pangesuh,
Tumangkar angrembaka,
Adi luhung edi peni,
Tata cara sinambrama upacara.
2.
Kang kawentar Guru Besar,
Panut Mulyono pinilih,
Pemimpin Universitas,
Gadjah Mada ing negeri,
Papane putra putri,
Pasuwitan ngudi ngelmu,
Sabang Merauke teka,
Ing pangangkah gelis wasis,
Pra sarjana labuh labet marang praja.
3.
Hardiyanto paring warah,
Tumrap sagung putra nagri,
Saindhenging nuswantara,
Ngulir nalar landhep lantip,
Rikat trengginas trampil,
Barang gawe purna rampung,
Siswane Gadjah Mada,
Sarwa bisa mitayani,
Rum kuncara mrih ngejayeng jagad raya.
VI
Pucung
1.
Maha Guru Suripto sung pambiyantu,
Rasa kamanungsan,
Lilih sakjroning penggalih,
Sembah tata raga cipta jiwa rasa.
2.
Maha Guru Panut Mulyono mituhu,
Rektor Gadjah Mada,
Pakarti laras agami,
Tepa slira karya suka mring sesama.
3.
Maha guru Hardiyanto murih hayu,
Lampah kedokteran,
Tebih saking suker sakit,
Patuladhan marga kabagyan kamulyan.
VII
Durma
1.
Jayabaya narendra gung binathara,
Prof Soeripto mastuti,
Lampah ngraga sukma,
Pamuja pangastawa,
Meditasi susilastuti,
Darma susetya,
Lir Begawan Ciptoning.
2.
Prof Panut Mulyono pindha Prabu Kresna,
Nata ing Dwarawati,
Pangarsa waskitha,
Mandhegani Gadjah Mada,
Ngesuhi pawiyatan inggil,
Mekar kasusra,
Ruming ibu pertiwi.
3.
Profesor Hardiyanto lir Abiyasa,
Ing Saptaharga wukir,
Mbabar widyatama,
Kedokteran mirunggan,
Wardaya eling manah wening,
Karsa mangajab,
Wilujeng waras wiris.
VIII
Asmarandana
1.
Prof Soeripto amemetri,
Raja agung Brawijaya,
Kalung emas sabuk cindhe,
Mulang muruk tanah Jawa,
Muksa ing pucaking arga,
Winastanan gunung Lawu,
Uga Mahendra Prawata.
2.
Panut Mulyono sumbang sih,
Minangka Rektor sembada,
Wirotama tandang gawe,
Kabeh dosen mahasiswa,
Sigrak gumyak penak jenak,
Gumregah nggennya sinau,
Trampil rikat cerdas tangkas.
3.
Jroning galih welas asih,
Hardiyanto Guru Besar,
Esuk sore cawe cawe,
Ing jagade pendidikan,
Kang kajangka mrih kajangkah,
Jumbuh kabeh kang ginayuh,
Jaya bumi nuswantara.
IX
Megatruh
1.
Sultan Agung kedhung kawruh adi luhung,
Prof Soeripto gya manggalih,
Ambaut ngelmu pangracut,
Nitipraja sastra gendhing,
Nglinang jiwa mengku raos.
2.
Nitipraja wulangan pemimpin ampuh,
Prof Panut Mulyono titis,
Tatag tutug tanggap tangguh,
Beres wasis samukawis,
Kesohor minangka Rektor.
3.
Empu Tantular pujangga kang misuwur,
Jaman Kraton Majapahit,
Prof Hardiyanto aniru,
Kinarya memulang murid,
Kitab Jawi ingkang cocok.
X.
Kinanthi
Mangkurat Amral Sinuwun,
Prof Soeripto milangeni,
Mbangun Kraton Kartasura,
Arta daya dana picis,
Jejeg tumangkar kawentar,
Ngelmu laku bakuh teguh.
2.
Pindha Prabu Hayamwuruk,
Prof Panut Mulyono nlesih,
Anulad tepa tuladha,
Kejayaan Majapahit,
Wibawa bagya widada,
Gadjah Mada Mahapatih.
3.
Yasadipura paring wuruk,
Pendidikan kang sejati,
Lumantar pustaka kuna,
Prof Hardiyanto marisi,
Langkah tangkas pikir cerdas,
Kanggo sangu darma bakti.
XI.
Maskumambang
1.
Maha Guru Soeripto manggih lestari,
Basuki tata raharja,
Meditasi nalagati,
Pangastawa katindakna.
2.
Maha Guru Panut Mulyono makarti,
Perguruan Gadjah Mada,
Kagem sarjana winasis,
Piguna tumrap negara.
3.
Maha Guru Hardiyanto wus peparing,
Kepinteran kedokteran,
Kinarya sanguning urip,
Darma bakti nusa bangsa.
XII.
Pucung
Bulaksumur papan pengajaran luhur,
Para dwijatama,
Nama perguruan tinggi,
Gadjah Mada manunggaling nusantara.
Selasa Paing,
24 Juni 2025
Purwadi,
Alumni Sarjana, Master, Doktor UGM.
