 |
| Ist |
Garda.id | BABAD HADEGING KRATON SURAKARTA
Dr Purwadi M.Hum
Ketua Lokantara
HP 087864404347
1.
Dhandhanggula
Genep pitulas Sura kang sasi,
Nuju tahun pitulas suwidak,
Minangka dadya wancine,
Sejarah hadegipun,
Kraton Surakarta nyarengi,
Pitulas patlima,
Genahe rong puluh,
Pebruari lumaksana,
Ratu Mas Paku Buwana mbangun puri,
Tata tentrem raharja.
Amenangi jaman retna rukmi,
Labuh labet Ratu Mas Lamongan,
Lir pendah puspa rinonce,
Rikat trengginas ayu,
Wasis titis ing samukawis,
Sugih arta ber bandha,
Ber bandhu sedulur,
Tanjung kodok tanjung perak,
Kayu jati pabrik trasi minyak bumi,
Dadya tepa tuladha.
Dadi putri Kanjeng Adipati,
Bupati Purbaya ing Lamongan,
Tedhake narendra gedhe,
Wayah Kanjeng Sinuwun,
Paku Buwana Kartawani,
Ibu trah Pamekasan,
Turun tanah Madu,
Adipati Cakraningrat,
Karsa dalem Sunan Amangkurat Jawi,
Mundhut mantu utama.
Ratu Mas Lamongan prameswari,
Kanjeng Sinuwun Paku Buwana,
Nata agung kapindhone,
Wolulas telung puluh,
Susuhunan apala krami,
Mboyong Kanjeng Ratu Mas,
Misuwur sempulur,
Angembani Kartasura,
Kanjeng Gusti Prabasuyasa lestari,
Narendra binathara.
2.
Sinom
Kutha ceraking bengawan,
Lamongan tlatah pesisir,
Bojonegoro lan Tuban,
Jombang Surabaya Gresik,
Kanjeng Purbaya Bupati,
Kesugihane misuwur,
Mbudidaya redana,
Ing wana gunung agunung,
Tepining gisik samudra,
Raja brana emas picis,
Mangka srana hadeging wangunan praja.
Kanjeng Ratu Mas Lamongan,
Kagungan glondhongan jati,
Ngupaboga pelabuhan,
Lenga semen marmer gamping,
Minangka pabrik dhuwit,
Tetanen wulu pametu,
Konjuk ing Sri Narendra,
Paku Buwana ping kalih,
Kraton dalem Surakarta Hadiningrat.
Dana prabeya Lamongan,
Gawan Ratu Mas Pesisir,
Pisungsung pindhahan praja,
Linggar saking Kartawani,
Bareng kawula dasih,
Surakarta gya binangun,
Pitulas papat lima,
Kalih dasa Pebruari,
Kutha praja anyar prabawa suminar.
3.
Kinanthi
Winarna Sinuwun Kombul,
Paku Buwana kaping dwi,
Tumuju kutha Lamongan,
Anitih baita rukmi,
Nama Kyai Rajamala,
Ginarebeg lan pengiring.
Enjang bidhal sru gumuruh,
Saking Surakarta nagri,
Lumampah angalor ngetan,
Karanganyar Sragen Ngawi,
Padhangan Cepu lan Tuban,
iline bengawan bening.
Pangeran Purbaya ewuh,
Gupuh suguh nganti anti,
Pra sentana Surakarta,
Nuli boyong nganten putri,
Angembani Kanjeng Sunan,
Paku Buwana kaping dwi.
4.
Pangkur
Emas picis raja brana,
Dadi srana pawitan yasa nagri,
Surakarta gya binangun,
Abdi dalem mesanggrah,
Wus cinatur pra sentana suka sukur,
Punjering pemerintahan,
Ponorogo handayani.
Sang Tumenggung Hanggawangsa,
Saking Kebumen kinen mandhegani,
Para tukang juru bangun,
Kedhaton Surakarta,
Pancen tangguh trampil kukuh kawruh wutuh,
Pagelaran pasewakan,
Alun alun pancaniti.
Pujangga Yasadipura,
Padmanagara lan Pangeran Wujil,
Sagung para ahli nujum,
Lilah Ki Gedhe Sala,
Anyengkuyung hadege negara agung,
Dhatulaya Surakarta,
Rahayu lancar lestari.
5.
Gambuh
Asma Sinuwun Kombul,
Raja unggul pribadi pinunjul,
Sabda aris penggalih manis lumaris,
Laku jujur mujur luhur,
Dana driyah gumarojog.
Lestantun Jeng Sinuwun,
Wus nenuwun kedhaton rumuhun,
Yasa puri Surakarta edi peni,
Wewangunan adi luhung,
Paku Buwana kesohor.
Jeng Ratu Mas mbiyantu,
Udhu bahu suku lan panemu,
Prameswari permati luhuring budi,
Ayu sulistya rahayu,
Ing lor kidul wetan kulon.
6.
Pucung
Kraton agung cerak manglung doh mentiyung,
Jeng Prabasuyasa,
Titis milih prameswari,
Guna kaya mbudidaya arta daya.
Jeng Sinuwun tekad ageng kebak purun,
Ratu Mas Lamongan,
Katelah Ratu Pesisir,
Tanjung perak juru pambelah kepenak.
Witing kayu jati becik unggul payu,
Regane wis larang,
Gunung Kendheng Renteng awis,
Ing Lamongan Tuban Blora tinanduran.
Sumber sumur minyak bumi nyembur makmur,
Ing Bajanegara,
Babat Tuban Blora Ngawi,
Kanjeng Ratu Mas Lamongan usahawan.
7.
Mijil
Ratu Mas ngungak jaman kawuri,
Momong momor momot,
Lampahan leluhur wus sumare,
Raja Jawi Panembahan Senapati,
Prabu Nyakrawati,
Kanjeng Sultan Agung.
Sunan Amangkurat sung palupi,
Tutug nggennya momong,
Raden Rahmat Raden Puger gedhe,
Mangkurat Amral Paku Buwana,
Ingkang kaping siji,
Pangarsa misuwur.
Patuladhan Amangkurat Jawi,
Mlebet jroning raos,
Mataram sangsaya kondhang rame,
Surabaya Adipati Pekik,
Madura Bupati,
Tambah kukuh bakuh.
8.
Asmarandana
Kang eyang Pangeran Pekik,
Adipati Surabaya,
Nitih kreta jaran kore,
Tumuju neng Tanjung perak,
Lelayaran ing Madura,
Sumenep Pamekasan trus,
Gancaring Sampang Bangkalan.
Sarem uyah damel pabrik,
Kalianget Pamekasan,
Tumangkar gelis tan suwe,
Raharja bumi Madura,
Tanah Jawi sisih wetan,
Pesisir sangsaya makmur,
iguh Ratu Mas Lamongan.
Turahan redana picis,
Kinarya nyumbang kasastran,
Ngrumpaka serat Cebolek,
Pujangga Yasadipura,
Aneng Kraton Kartasura,
Dewaruci sana sunu,
Kababar dadi wewarah.
9.
Megatruh
Sigra meling Ratu Mas asung pitutur,
Kayu jati minyak bumi,
Prayoga warata didum,
Adhedhasar bener adil,
Kawula alit miraos.
Sigra kesdu Kanjeng Ratu Mas mituhu,
Tindak tanduk amakarti,
Amrih cekap cakap cukup,
Kanugrahan ing negari,
Aweh ayem lahir batos.
Sigra luhur ratu Mas aparing tutur,
Redana bumi pertiwi,
Tandur subur gawe makmur,
Suka rena saben jalmi,
Pasuryan seneng mencorong.
10.
Maskumambang
Sana sunu kasusatran mardi murid,
Becik tumrap para muda,
Tembe dadi jalma wasis,
Darma bekti marang praja.
Ratu Mas Lamongan tansah amaringi,
Prabeya tumraping siswa,
Anugraha dwijatama,
Miturut bebungah beslit.
Duk nalika Jeng Ratu Mas ngudi ilmi,
Aneng nagri Eropah,
Jerman Suwis Inggris Prancis,
Mesir Turki Arab Bagdad.
11.
Durma
Sandhang pangan papan sarwa kacukupan,
Ratu Mas angupadi,
Mbathik ing Laweyan,
Ambangun pesanggrahan,
Sega liwet wilayah Baki,
Paraga Jatisawit.
Kalidawir Tulungagung pinter masak,
Mligi Jeng prameswari, Sanggrahan Prambanan,
Suguhan dhatulaya,
Bawah koki Nganjuk Kediri,
Damis Wariya,
Juru adang winasis.
Gandarasan pawon suka parisuka,
Pindhahipun negari,
Kraton Surakarta,
Ngejayeng rum kuncara,
Gya mangasah mingising bumi,
Masuh nirmala,
Lumaksita lestari.rel
