Hari Kartini
1.
Dhandhanggula
Raden Ajeng Kartini winarni,
Putri sejati ing nusantara,
Yekti saking pesisir ler,
Mayong Jepara tuhu,
Sasraningrat Sri Adipati,
Nggulawenthah sekolah,
Bangsa murih maju,
Nyengkuyung Sasrakartana,
Sung palupi rayi Kardinah Rukmini,
Drajat luhur wanita.
2.
Mijil
Nuju tanggal ing selikur April,
Tahunipun miyos,
Wolulas pitu sanga petunge,
Jayadiningrat Rembang Bupati,
Garwa Jeng Kartini,
Kersa mbabar ngelmu.
3.
Maskumambang
Raden Ajeng Kartini putri sejati,
Wus kaloka arum nama,
Pendhekar ibu pertiwi,
Anjunjung drajat wanita.
4.
Pangkur
Sekolah mapan ing Rembang,
Tatas titis tinata gelis wasis,
Pawiyatan putri Bulu,
Sinau nulis maca,
Mbabar kawruh Kartini paring pituduh,
Emansipasi wanita,
Kokoh terampil mandhiri.
5.
Pucung
Sami srawung ajaran Kartini dunung,
Tumraping wanita,
Darma bakti mring negeri,
Pendidikan sarana nggayuh kamulyan.
Purwadi,
Universitas Negeri Yogyakarta.
