Kamis, 16 April 2026
| Ist |
Garda.id | Natal Rahayu Lestari
1.
Dhandhanggula
Jagad terang cahya anelahi,
Mbabar suwasana bagya mulya,
Tanggal selawe Desember,
Ing rong ewu patlikur,
Hari Natal kadang Nasrani,
Katholik myang Protestan,
Arsa suka sukur,
Konjuk Hyang Maha Kuwasa,
Amastuti lestari sagung dumadi,
Tentrem tata raharja.
2.
Mijil
Jawat asta kadang mitra sami,
Manunggal gumolong,
Jroning sedya lahir batin ndherek,
Caos puji Hari Natal sung sesanti,
Pinanggih basuki,
Widada rahayu.
3.
Gambuh
Natal mengku pituduh,
Kawruh wutuh wejangan sesepuh,
Wulang wuruk wedharan budi pekerti,
Badan bakuh jiwa tangguh,
Kapribaden tanggap tanggon.
4.
Pucung
Kang tinemu lambaran lenging lelaku,
Manggih Hari Natal,
Pinilih manah penggalih,
Asih asah asuh suhing kang wewarah.
5.
Kinanthi
Sambang sambung sawang srawung,
Sigrak gumyak merak ati,
Pahargyan ing Hari Natal,
Busana ketingal asri,
Bebrayan sadhengah papan,
Pasuryan karya memanis.
6.
Megatruh
Wus sumilir angin suwarga rahayu,
Tumurun saking wiyati,
Binarung aganda arum,
Sumawur gambir melathi,
Natalan lamun karaos.
7.
Pangkur
Sigra bidhal Hari Natal,
Saben margi cepak maneka warni,
Gathuk mathuk dhahar ngunjuk,
Raket kadang memitran,
Kanca dulur tamu pinarak sempulur,
Wahana imbal wacana,
Saranane nemu becik.
8.
Asmarandana
Sumusup ing rasa jati,
Natalan ngemu surasa,
Ning nung dunung nang neng mudheng,
Sari wignyan sangkan paran,
Wosing ngelmu kasampurnan,
Widyatama kawruh sepuh,
Gumelaring alam padhang.
9.
Durma
Tata titi tatas titis tutug tatag,
Pratitis samukawis,
Manah panarima,
Sabar tampi pacoban,
Cakra gilingane ngaurip,
Ing Hari Natal,
Ngerti rasa sajati.
10.
Sinom
Natal sabarang ngumandhang,
Gembira lumahing bumi,
Sambatan daya dinayan,
Tekad gemblenging pambudi,
Lumampah jroning kapti,
Pangrungu cipta pandulu,
Ngarah arah panembah,
Manunggal Kawula Gusti,
Gya sumirat merbawani prabaning rat.
11.
Maskumambang
Cahya natal bagas laras laris aris,
Keh jalma suka gembira,
Adi luhung edi peni,
Sumilak arum kuncara.
25 Desember 2024
Atur pisungsung
Purwadi
